Претседателот на Соединетите Американски Држави, Доналд Трамп, денеска изјави дека е запознаен со новиот ирански предлог и го смета за неприфатлив, тврдејќи дека Израел немаше да постои ако не беа тој и премиерот на земјата, Бенјамин Нетанјаху.
Во изјава за израелскиот јавен сервис Кан, Трамп рече дека „го разгледал новиот ирански предлог и дека не е прифатлив за нив“, нагласувајќи дека „операцијата оди одлично“.
Трамп, исто така, го повтори својот повик до израелскиот претседател Исак Херцог да го помилува Бенјамин Нетанјаху, нагласувајќи дека, како што изјави, „ова е премиер во воено време“.
„Израел немаше да постои без мене и Биби (прекар) Нетанјаху. Ви треба премиер кој може да се фокусира на војната, а не на глупости“, заклучи Трамп.
На почетокот на март, Трамп повторно го повика Херцог да го помилува Нетанјаху, или поточно да го ослободи од обвиненијата за корупција, велејќи дека премиерот не треба да има ништо на ум освен војна со Иран.
„Не сакам ништо да го мачи Биби освен војна со Иран. Херцог е срам, пет пати ми вети дека ќе го помилува Биби“, изјави Трамп за израелската телевизија Н12.
Нетанјаху е првиот израелски премиер обвинет за поткуп, измама и кршење на довербата од 2019 година, што тој го негираше.
Трамп постојано го повикуваше израелскиот претседател Исак Херцог да му даде помилување на Нетанјаху.
Нетанјаху го поднесе своето барање за помилување во ноември.
Херцог во минатото го оспоруваше тврдењето на Трамп дека ветил дека ќе му даде помилување на Нетанјаху, а во февруари, како одговор на сличен повик од Трамп, рече дека Израел е суверена држава управувана од владеењето на правото.
Според израелскиот закон, претседателот има овластување да помилува осудени лица, но нема преседан за давање помилување во средината на судењето.
