Папата Лав XIV призна за време на летот за Шпанија, каде што е на повеќедневна посета, дека е навивач на Реал Мадрид. Иако нагласи дека неговата улога е да „припаѓа на сите тимови“, тој приватно има наклонетост кон мадридскиот клуб, објави шпанскиот весник Марка.
Папата Лав XIV, роден како Роберт Франсис Превост, ги откри своите фудбалски симпатии за време на неговото апостолско патување во Шпанија.
Во авионот на пат кон Мадрид, во неформален разговор со новинарите што ја следеа неговата посета, тој хумористично одговори на прашање кое долго време ја интригира спортската јавност.
Неговата изјава брзо стана една од главните теми во шпанските медиуми.
Кога директно го прашаа дали го претпочита Реал Мадрид или Барселона, тој даде дипломатски, но недвосмислен одговор:
„Едноставно е – папата ги поддржува сите тимови, но Роберт Превост го поддржува Реал Мадрид“, рече папата Лав XIV.
Овој хумористичен контраст помеѓу неговата официјална улога како поглавар на сите католици и неговите лични преференции предизвика насмевки и одобрување кај присутните во авионот.
Реакциите од светот на фудбалот следеа речиси веднаш. Претседателот на Реал Мадрид, Флорентино Перез, ги опиша зборовите на Папата како „голема чест и гордост“ за целиот клуб.
🤍 The Pope is a Real Madrid fan. Welcome, Leo XIV! pic.twitter.com/N2iim9ovM3
— Real Madrid C.F. 🇬🇧🇺🇸 (@realmadriden) June 6, 2026
Ова не е првпат патиштата на мадридскиот клуб и новиот Папа да се вкрстат. Откако Превост беше избран за наследник на папата Франциск во мај 2025 година, Реал Мадрид му испрати официјална честитка.
Честитки пристигнаа и од соперничкиот табор, бидејќи ФК Барселона исто така му испрати најдобри желби на папата Лав XIV за неговиот избор.
Иако сега ја откри својата наклонетост кон Реал Мадрид, папата Лав XIV е познат и како голем обожавател на други спортови. Тој е особено љубител на тенисот и бејзболот, спортови кои се многу популарни во Соединетите Американски Држави.
