Шефот на руската дипломатија, Сергеј Лавров, денеска предупреди дека Русија „немилосрдно ќе одговори“доколку, како што изјави, „нацистичките сили“ се обидат да се загрозат или го попречат прославувањето на Денот на победата во Русија.
За време на церемонијата на положување венци во зградата на Министерството за надворешни работи во Москва, Лавров оцени дека современите безбедносни и политички околности во Европа бараат, како што рече, „идеолошка и практична борба против нацизмот“, објавија руските медиуми.
Првиот руски дипломат предупреди на, како што тврди, обидите за „ревидирање на историјата и исходот од Втората светска војна“ и изјави дека во некои европски политички кругови има повици за повторување на историските модели кои, според него, се поврзани со нацистичка Германија.
„Знам дека се одржуваат настани во странство, вклучително и во земји со неповолни услови – Бесмртниот полк во различни формати и други настани што го привлекуваат вниманието на земјите домаќини на нашите дипломати кон фактот дека овој подвиг никогаш нема да исчезне од нашето сеќавање. А нацизмот, без разлика во каква форма се прероди, ќе биде поразен“, рече Лавров.
Рускиот министер се осврна и на изјавите на германскиот канцелар Фридрих Мерц за зајакнување на германските вооружени сили и амбицијата повторно да станат најсилни во Европа, и ги оцени како „зачудувачки“.
Тој, исто така, ги критикуваше „пошироките трендови“ во рамките на Европската унија и западните структури, тврдејќи дека одредени политики во Брисел поттикнуваат „реваншистички тенденции“ и ги влошуваат односите во Европа.
Зборувајќи за војната во Украина, Лавров го повтори ставот на Москва дека, како што рече, целите се „денацификација“ и отстранување на безбедносните закани од територијата на Украина, со обвинувања дека Западот го користи Киев како инструмент за притисок врз Русија.
Тој заклучи дека Русија ќе одговори на сите безбедносни закани што доаѓаат од украинска територија и повтори дека, според него, „нема да има милост“ за оние што ги загрозуваат руските интереси.
„Сакам да кажам со сета искреност и со сета одговорност: доколку тоа што го прават оживеаните нацисти на Запад преку Украина е тоа што го прават сега, нема да има милост за нив“, нагласи Лавров.
