Германската влада планира да воведе построги правила за отворање боледување, според кои вработените ќе мора да одат на лекар првиот ден од болеста за да добијат дијагноза. Канцеларот Фридрих Мерц изјави дека целта е да се зголеми продуктивноста и да се намали бројот на денови поминати на боледување.
Според новите предлози на германскиот канцелар Фридрих Мерц, вработените повеќе нема да можат да добијат потврда за боледување со јавување на лекар, ниту ќе можат да чекаат третиот ден од отсуството за да поднесат потврда.
Наместо тоа, секој што сака да отвори боледување ќе мора лично да се јави кај лекарот првиот ден од болеста.
„Бројот на денови поминати на боледување е превисок. Воведуваме низа мерки што ќе им овозможат на вработените и компаниите да го променат тоа“, рече Мерк.
Тој додаде дека тоа е тешка одлука, но дека Германија повеќе не може да си дозволи пад на конкурентноста поради долготрајни отсуства од работа.
„Знаеме дека ова е тешка одлука, но повеќе не можеме да си го дозволиме конкурентскиот хендикеп предизвикан од продолжените отсуства од работа“, рече германскиот канцелар.
Предложените мерки беа остро спротивставени од синдикатите и медицинската професија.
Претседателот на синдикатот Верди, Франк Вернеке, ја обвини владата за создавање „култура на недоверба кон вработените“.
Матичните лекари, исто така, се изјаснија против тоа, предупредувајќи дека нивните ординации ќе бидат преплавени со пациенти на кои не им е потребен преглед.
„Нашите ординации ќе бидат преплавени со луѓе на кои не им е потребна лична медицинска помош и би било подобро да останат во кревет“, изјави Германското здружение на матични лекари, нарекувајќи го предлогот „апсолутна катастрофа“.
Според податоците од германските власти, вработените во таа земја користат просечно околу 15 работни дена боледување годишно.
Промените се дел од поширок пакет економски реформи договорени од владата за зголемување на продуктивноста и зајакнување на јавните финансии.
