Митко Андреевски, енергетски експерт во поткастот „Каде се парите“ дискутираше за случувањата на Блискиот Исток и нагласи дека во услови на глобална, светска и економска криза, државата нема недостаток со нафта и нафтени деривати, ниту со природен гас до овој момент, потенцирајќи дека континуирано се врши испорака на нафта.
„Кризата како го погодува целиот свет, а вклучително и Македонија ги чувствува тие ценовни шокови. Иако, за волја на вистината ние не чувствуваме проблем или недостаток со нафта и нафтени деривати, ниту со природен гас до овој момент“, рече енергетскиот експерт Андреевски.
Андреевски истакна дека чекорите кои ги презема Владата за пуштање на продуктоводот за нафтени деривати Солун-Скопје, на нашата држава и дава додадена вредност.
Според него, кога државата се наоѓа во енергетски коридор покрај додадена вредност, дава и сигурност за државата.
„На нашата држава и дава додатна вредност. Јас мислам дека тоа е добар проект, дека продуктоводот треба да се експлоатира до максимум, да се стимулира таа компанија да извезува од нафтените деривати. И сигурност. Секогаш кога се наоѓате како држава во некаков коридор, енергетски, тоа ви дава и додатна вредност и сигурност“, кажа Андреевски.
