Велика Британија се подготвува за еден од најдолгите топлински бранови од 1976 година, а во Англија во сила се портокалови и жолти предупредувања поради високите температури, соопшти денеска Агенцијата за здравствена безбедност на Велика Британија (UKHSA).
Температурите оваа недела во делови од јужна Англија би можеле да достигнат 36 степени Целзиусови, наведува Агенцијата, пренесе Би-Би-Си.
Подрачјата на Мидлендс, источна и јужна Англија се наоѓаат под портокалово здравствено предупредување поради жештините издадено од UKHSA, кое важи до 21 часот на 12 јули. Истовремено, во истиот период во сила се жолти предупредувања поради жештините во северна Англија.
Се очекува значително влијание на високите температури врз здравствените и социјалните служби, вклучувајќи и зголемување на бројот на смртни случаи, особено кај лицата постари од 65 години и оние со здравствени проблеми.
Делови од југот и истокот на земјата официјално влегоа во период на топлински бран во понеделникот, откако три дена по ред беа забележани температури над дефинираните прагови. Условите за прогласување топлински бран беа исполнети вчера, кога температурата достигна 32,4 степени во Тедингтон, во лондонската општина Ричмонд на Темза, како и во Кент.
Во наредните денови уште повеќе локации би можеле да забележат температури од 34 или 35 степени, а најтопло најверојатно ќе биде во јужна Англија. Топлинскиот бран до петок ќе се шири кон север и запад, вклучувајќи ги Северна Ирска и Шкотска, каде се очекуваат максимални температури во високите 20-ти степени.
Како што ќе се приближува крајот на неделата, подрачјето на висок притисок ќе се поместува, а ќе засили источниот ветер, поради што температурите малку ќе паднат во источните делови на Велика Британија, но многумина и понатаму ќе останат во услови на топлински бран. Жариштето на жештините потоа ќе биде поместено позападно, особено кон централните и јужните делови на Англија. Во јужен Велс во петок температурата би можела да достигне 33 степени.
За разлика од топлинскиот бран на крајот на јуни, нивото на влажност на воздухот сега е пониско, поради што високите температури се чувствуваат како помалку неподносливи, меѓутоа, влажноста повторно расте. Не е исклучено ниту појавување на неколку тропски ноќи, кога температурата во текот на ноќта не паѓа под 20 степени, особено подоцна во текот на неделата во поголемите градови и урбаните средини.
Во овој момент не се очекува температурите да ги соборат рекордите, како што беше случај при топлинските бранови во мај и јуни, сепак, овој топлински бран би можел да биде еден од најдолготрајните од чудниот бран жештини во 1976 година. Тогаш во Англија на повеќе локации беа забележани меѓу 13 и 16 последователни денови со температури над 30 степени. (МИА)
