Вршителката на должноста американски амбасадор во Украина, Џули Дејвис, ќе ја напушти функцијата и заминува во пензија, во период на застој во преговорите за прекин на војната.
Весникот „Фајненшл тајмс“ прв јави за нејзиното заминување, наведувајќи дека тоа е поврзано со разлики во ставовите околу политиката на претседателот Доналд Трамп и намалена мотивираност поради ослабената поддршка за Украина.
Стејт департментот ги отфрли таквите тврдења.
„Амбасадор Дејвис е цврст поддржувач на напорите на администрацијата на Трамп за постигнување траен мир меѓу Русија и Украина“, изјави портпаролот на Стејт департментот, Томи Пигот.
Тој додаде дека Дејвис ќе продолжи да ја извршува функцијата до јуни 2026 година, кога официјално ќе се повлече од дипломатската служба.
Дејвис, која е долгогодишна дипломатка со повеќе од три децении искуство, ја презеде функцијата вршител на должност амбасадор во Киев во мај 2025 година, по оставката на нејзината претходничка Бриџит Бринк, која се повлече поради несогласувања со политиката на Вашингтон.
Од стапувањето на должност во јануари 2025 година Доналд Трамп врши силен притисок за постигнување примирје меѓу Украина и Русија, но засега не успева да стави крај на војната преку преговорите за прекин на огнот, кои во голема мера се во застој бидејќи Вашингтон е фокусиран на конфликтот со Иран. Трамп има понаклонет пристап кон рускиот претседател Владимир Путин.
Џули Дејвис е амбасадор на САД во Кипар од 2023 година и ги извршуваше и тие должности за време на престојот во Киев.
