Шокантна одлука од Бакингемската палата: Ендру ќе ги изгуби сите титули, Сара Фергусон ќе го промени идентитетот
Принцот Ендру, помладиот брат на британскиот крал Чарлс III, објави дека се откажува од сите свои титули, вклучително и титулата војвода од Јорк.
Овој развој на настаните следи по низа нови скандали поврзани со неговите релации со Џефри Епштајн и неговата врска со наводен кинески шпион.
„Во разговорите со кралот и моето најблиско и пошироко семејство, заклучивме дека континуираните обвинувања против мене го одвлекуваат вниманието од работата на Неговото Височество и Кралското семејство. Решив, како и секогаш, да ја ставам мојата должност кон семејството и земјата на прво место. Стојам зад мојата одлука од пред пет години да се повлечам од јавниот живот. Со согласност на Неговото Височество, сметаме дека сега морам да направам чекор понатаму. Затоа, повеќе нема да ја користам мојата титула или почестите што ми се доделени. Како што реков, силно ги негирам обвинувањата против мене“, рече Ендру.
Островските медиуми пишуваат дека тој ги донел одлуките по голем притисок од кралот Чарлс. Тој исто така ќе се откаже од членството во Редот на жартиерата, но сепак ќе остане принц, бидејќи е роден како син на Елизабета II.
Поранешната сопруга на војводата, Сара, војвотката од Јорк, исто така ќе се откаже од својата титула и ќе биде позната едноставно како Сара Фергусон.
Во својот прв коментар за одлуката на принцот Ендру, Би-Би-Си пишува дека „во долгата низа јавни понижувања, ова е уште едно и најзначајно“.
„Принцот Ендру веќе ја изгуби својата улога како член на кралското семејство, како и своите воени титули и позиција на речиси сите јавни настани поврзани со кралското семејство. Но, сега исчезнуваат и титулите на кои беше толку горд: Војводата од Јорк и Редот на жартиерата. Помпезноста и церемонијата на кралскиот живот му беа важни. Неговите титули му даваа огромно чувство на лична гордост. Но, обвинувањата не престанаа да доаѓаат. Тоа беше бесконечно одвлекување на вниманието, одвлекување на вниманието од работата на другите членови на кралското семејство“, пишуваат тие.
Досега палатата се спротивставуваше на преземањето такви драстични мерки, но чувствуваше дека конечно е принудена да преземе акција. Тие се свесни, пишуваат островските медиуми, дека веројатно ќе дојдат уште многу откритија за врската на војводата со Епштајн, покојниот педофил и финансиер.
Промената на насоката дојде и откако „Телеграф“ откри во четврток дека војводата се сретнал со Цаи Ќи, висок кинески функционер во центарот на случајот со шпионажата во Пекинг, најмалку три пати помеѓу 2018 и 2019 година. Тој го поканил и во Бакингемската палата на ручек во 2018 година, објавува „Телеграф“.
