На Светското првенство 2026 во САД, Канада и Мексико ќе настапат вкупно 1.248 фудбалери.
Секоја од 48-те репрезентации има право да пријави по 26 играчи, од кои тројца се голмани.
Интересен податок е кои клубови ќе имаат најголем број свои фудбалери на најголемиот Мундијал во историјата.
Очекувано, најмногу репрезентативци има англискиот шампион Манчестер Сити – дури 19, што претставува нов рекорд за едно Светско првенство.
Во составот на „граѓаните“ има четворица англиски репрезентативци и тројца Португалци, по двајца Хрвати и Холанѓани, како и по еден Норвежанец, Шпанец, Французин, Белгиец, Алжирец, Египќанец, Ганец и Узбекистанец.
Само еден играч помалку на Мундијалот ќе има Баерн Минхен, додека по 16 претставници ќе имаат финалистите во овогодинешната Лига на шампиони – Арсенал и Пари Сен Жермен.
Барселона ќе биде претставена со 15 фудбалери, а по 12 репрезентативци имаат Манчестер Јунајтед, Атлетико Мадрид, Кристал Палас и единствениот неевропски клуб во ова друштво – Ал Хилал.
По 11 играчи на Светското првенство ќе имаат Борусија Дортмунд, Ливерпул, Галатасарај, Челси и Сандерленд.
На Мундијалот ќе бидат застапени дури 449 различни клубови од 71 земја, од кои 35 се европски.
Воедно, составите на репрезентациите покажуваат големи разлики во националните профили.
Катар и Саудиска Арабија речиси целосно се потпираат на фудбалери од домашните првенства – по 25 од 26 играчи доаѓаат од нивните лиги. Од друга страна, репрезентациите на Зеленортските Острови, ДР Конго, Брегот на Слоновата Коска, Курасао, Сенегал и Уругвај целосно се составени од играчи кои настапуваат во странство.
Од светски ѕвезди до дебитанти
Составите на репрезентациите ја отсликуваат досега невидената разновидност и глобална застапеност на светскиот фудбал.
Лионел Меси, Кристијано Роналдо и Гиљермо Очоа се подготвуваат за својот историски шести настап на Светско првенство.
Вкупно 357 фудбалери повторно ќе настапат на Мундијалот, откако веќе биле дел од некој од претходните светски шампионати.
Истовремено, дури 891 играч за првпат ќе го почувствува искуството на најголемата фудбалска сцена, што претставува спој на континуитет и генерациска смена во светскиот фудбал.
Повеќе од 25 години разлика има меѓу највозрасниот и најмладиот учесник на турнирот. Најстар е шкотскиот голман Крег Гордон со 43 години и 162 дена, додека најмлад е Мексиканецот Гилберто Мора со 17 години и 240 дена.
На Светското првенство би можеле да настапат вкупно 22 фудбалери помлади од 20 години, како и седуммина играчи постари од 40 години.
На светската сцена ќе се појават и 22 фудбалери кои во минатото веќе успеале да го освојат највредниот трофеј во фудбалот – Светското првенство.
