Кина е позната по инфраструктурни проекти, како што се најголемата брана во светот, најдолгата мрежа на брзи железници, најголемата ветроелектрана…
Со истото темпо со кое градат, Кинезите со децении се обидуваат да ја „изградат“ и природата.
Амбициозен проект
Имено, во 1978 година, Кина започна амбициозен проект за пошумување, познат како „Голем зелен ѕид“, со цел намалување на ерозијата на почвата и ублажување на пустинските бури.
Според Ројтерс, Кина засадила околу 300.000 км² шума (што одговара на приближно 30 милиони хектари). Така, вкупната шумска покриеност на земјата се зголемила од околу 10% (во 1949 година) на приближно 25% (во 2024 година).
Според некои проценки, Кина засадила околу 78 милијарди дрвја од почетокот на 1980-тите.
Сепак, нова студија објавена во 2025 година во научното списание „Иднината на Земјата“ покажува дека масовното уништување на шумите имало несакани последици – особено кога станува збор за дистрибуцијата на вода.
Промени во два клучни региони?
Истражувачи од Универзитетот Тјанџин, Земјоделскиот универзитет во Пекинг и Универзитетот во Утрехт ги анализирале промените од 2001 до 2020 година.
Резултатите покажуваат дека зголемувањето на вегетацијата довело до намалување на водните ресурси во два клучни региони:
– источната монсунска област;
– северозападната сушна област.
Заедно, овие региони покриваат околу 74% од територијата на Кина, што го прави откритието особено значајно, објавува „Лајв саенс“.
Главната причина лежи во процес познат како евапотранспирација – комбинација од испарување и транспирација, односно ослободување на водена пареа од растенијата.
-Овие промени доведоа до прераспределба на врнежите, насочувајќи повеќе влага кон Тибетската висорамнина, каде што е забележано зголемување на достапноста на вода, тврдат авторите.
„Спротивно на тоа, источна и северозападна Кина се соочуваат со намалување на водните ресурси, при што северозападниот дел е најпогоден поради пренасочувањето на влагата кон Тибетската висорамнина“, се додава во студијата.
Авторите истакнуваат дека идните проекти за пошумување треба повнимателно да го земат предвид влијанието врз водните ресурси, објавува Popular Mechanics.
„Нашите наоди покажуваат дека промените во земјишната покривка можат да ги прераспределат водните ресурси меѓу регионите. Разбирањето на овие ефекти е клучно за одржливо управување со земјиштето и водата во Кина“, се вели во студијата.
