Италијанското Министерство за здравство соопшти дека сите досега направени тестови на хантавирус кај лицата кои се ставени под медицински надзор се негативни, додека вкупно шест луѓе и понатаму се под надзор поради потенцијална изложеност на вирусот.
Според соопштението, надзорот се спроведува над патници кои биле поврзани со низа летови и контакти со лица кај кои постоел сомнеж за инфекција, вклучувајќи го и случајот со жената која подоцна почина од хантавирус, пренесе Анса.
Меѓу лицата под надзор се патници од летот на „KLM Royal Dutch Airlines“ од Јоханесбург кон Холандија, како и патници кои имале индиректен контакт со истата патничка за време на патувањето помеѓу Света Елена и Јужна Африка.
Ресорното министерство прецизираше дека тестовите спроведени во римската болница за инфективни болести се негативни и кај повеќе лица кои беа во карантин во Италија, вклучувајќи патници, еден британски турист и медицински надгледувани членови на екипажот. Меѓу тестираните лица се наоѓаат и патници сместени во карантин во различни делови на Италија, вклучувајќи ги подрачјата на Милано, Калабрија и Неапол, откако беше утврдено дека биле на исти летови како и заразеното лице.
Здравствените власти претходно наведоа дека во Италија и понатаму се следат вкупно шест лица, иако засега ниту еден случај на инфекција не е потврден.
Министерството за здравство на Италија соопшти дека ситуацијата и понатаму се следи, но оти досегашните резултати од тестирањата не укажуваат на присуство на вирусот кај лицата под надзор.
