Поранешната германска канцеларка Ангела Меркел денеска во Стразбур го прими Европскиот орден за заслуги, со кој Европскиот парламент и оддаде признание за нејзиниот децениски ангажман и посветеност на Европската Унија.
Меркел е вклучена меѓу првите 20 добитници на ова одликување, кое беше воведено минатата година. Таа е примена како „истакнат член“ на орденот, што претставува највисоко од вкупно трите нивоа на ова признание, заедно со украинскиот претседател Володимир Зеленски и поранешниот полски претседател Лех Валенса. На свечената церемонија во Стразбур присуствуваше и самиот Валенса, додека Зеленски беше отсутен.
Во својот говор пред европратениците, Меркел упати сериозно предупредување дека современата демократија се наоѓа под голем притисок. Таа повика на безусловно зачувување на демократијата, мирот и просперитетот како клучни ветувања кон граѓаните на ЕУ. Меркел особено ја нагласи заканата што доаѓа од социјалните мрежи, каде што, според нејзините зборови, „фактите одеднаш престануваат да бидат факти“, со што директно се загрозуваат темелите на просветителството.
За време на нејзиното раководење со Германија од 2005 до 2021 година, Меркел во јавноста се стекна со епитетот „кризен менаџер на Европа“. Нејзиниот 16-годишен мандат беше одбележан со Големата рецесија, еврокризата, бегалската криза во 2015 година, Брегзит, како и со пандемијата на коронавирусот. Покрај неа, со орденот беа одликувани главно поранешни лидери на земјите членки на ЕУ, како и поранешни челници на Европската централна банка и на НАТО. Меѓу наградените се најдоа и истакнати личности од невладиниот сектор, спортот, религијата и музиката, како што е ирската рок-група „У2“ (U2) предводена од фронтменот Боно.
– Европа не ни е дадена на подарок – истакна претседателката на Парламентот, Роберта Мецола, за време на церемонијата. – Таа се градеше договор по договор, криза по криза, и тоа од луѓе кои избраа солидарност наместо поделби и соработка наместо личен интерес – посочи Мецола.
