Дени Вилнев и Тимоте Шаламе претставија нов, акционен трејлер за „Дина: Дел 3“, кој го дава најдеталниот поглед досега на долгоочекуваното финале на нивната научно-фантастична трилогија.
Според „Варајети“, номинираниот за Оскар режисер и главната ѕвезда на филмот вчера во Лос Анџелес прикажаа нови снимки пред полна сала обожаватели и новинари. Глобалниот IMAX настан беше истовремено емитуван во Чикаго, Далас, Торонто, Монтреал, Лондон, Берлин, Мексико Сити и Абу Даби.
„Дина: Трет дел“ ја продолжува приказната за Пол Атреидес (Шаламе) по неговото доаѓање на власт. Заплетот, инспириран од романот „Месија на дините“ на Френк Херберт, се одвива 17 години по настаните од претходниот филм и ги истражува последиците од владеењето на Пол како император. А работите стануваат екстремно темни.
Пол е познат по тоа што е надарен со визии за иднината, но неговиот ум е замаглен откако ја презеде контролата врз галаксијата. „Иднината ми зборува на свој начин“, вели Пол во трејлерот. „Не можам да видам што е пред мене“.
Пол се соочува и со нов противник, Скитал, кој го игра Роберт Патинсон.
„Ќе удриме во самото срце на империјалната моќ“, најавува Скитал, јасно ставајќи до знаење дека неговата цел е промена.
Трејлерот, исто така, силно се фокусира на Зендаја како воинот од Фремените Чани, чија романса со Пол е дополнително комплицирана од неговиот брак со принцезата Ирулан (Флоренс Пју), која сега сака дете.
Се враќа и Данкан Ајдахо (Џејсон Момоа), бестрашен воин кој умре бранејќи го Пол и неговата мајка, а сега е воскреснат како гол – еден вид клон. Скитал му го испраќа ова на Пол како „подарок“.
Официјалниот трејлер за „Дина: Дел 3“ собра повеќе од осум милиони прегледи за само 16 часа од објавувањето, а реакциите на социјалните мрежи беа претежно позитивни.
„За мене е неверојатно што некој заврши трилогија од ваков обем за само пет години“, напиша еден коментатор на YouTube.
„Ако филмот успее да пренесе барем дел од емоциите што ги носи овој трејлер, публиката би можела да доживее нешто навистина незаборавно“, додаде друг.
„Изгледа фантастично. Знам дека мораа да променат некои работи од книгата, но изгледа брутално“, напиша трет.
Дина: Дел 3 излегува во кината на 17 декември.
