Американскиот министер за одбрана Пит Хегсет денеска ги повика азиските сојузници да ги зголемат воените трошоци за да се спротивстават на растечката моќ на Кина и да ја спречат нејзината доминација во регионот, предупредувајќи на „оправдана тревога“ поради нејзиното брзо воено засилување.
Зборувајќи на Дијалогот Шангри-Ла во Сингапур, водечкиот форум во Азија за лидери во одбраната, војската и дипломатите, Хегсет исто така рече дека посилните, понезависни сојузници се клучни за одвраќање.
– Постои оправдана тревога поради историското засилување на кинеската армија и проширувањето на нејзините воени активности во регионот и пошироко. Пацифик доминиран од кој било хегемон би го нарушил регионалниот баланс на моќ. Ниту една земја, вклучително и Кина, не може да наметне хегемонија и да ја доведе во прашање безбедноста на нашата нација и нашите сојузници, рече Хегсет.
САД, посочи тој, очекуваат нивните азиски сојузници и партнери да ги зголемат трошоците за одбрана на 3,5 проценти од БДП, бидејќи ветија дека ќе инвестираат 1,5 трилиони долари во својата војска. Хегсет нагласи дека сојузниците сакаат стабилност, а не ескалација.
