Светското првенство официјално доби своја химна. Колумбиската ѕвезда Шакира и нигерискиот кантавтор Бурна Бој ги здружија силите за песна наречена „Даи Даи“, потврди соопштението на ФИФА во петокот.
„Даи Даи“ ги спојува глобалните звуци и енергија на Шакира и Бурна Бој во шарена прослава на фудбалот, културата и единството“, се вели во соопштението.
Самото име „Даи Даи“ е италијански израз што значи „ајде“ или „ајде да одиме“ и често се користи како повик на охрабрување. Повеќејазичниот рефрен на песната – „Dai dai, Ikó, dale, allez, let’s go!“ – се стреми да го евоцира глобалниот дух што го дефинира Светското првенство.
Текстот на песната ги споменува некои од најголемите легенди на овој спорт, вклучувајќи ги: Пеле, Марадона и Малдини, Ромарио, Кристијано Роналдо и Бекам, Кака, Мбапе, Иниеста, Меси и Салах, но и Карлос Валдерама, легендарниот колумбиски фудбалер.
На почетокот на мај, Шакира навести за оваа вест споделувајќи краток клип од песната на социјалните мрежи со пораката: „Од стадионот Маракана, доаѓа „Даи Даи“, официјалната песна на Светското првенство на ФИФА во 2026 година“.
ФИФА објави дека приходите од авторските права на песната, која е достапна на сите главни платформи за стриминг, ќе бидат насочени кон Фондот за глобално граѓанско образование на ФИФА.
Ова е вторпат Шакира да биде избрана за автор на официјалната химна на Светското првенство. Таа го направи тоа за првпат во 2010 година со глобалниот хит „Waka Waka (Овој пат за Африка)“ за првенството во Јужна Африка.
Покрај објавувањето на националната химна, ФИФА во четврток потврди дека финалето на првенството, кое ќе се игра на 19 јули во Њу Џерси, ќе биде проследено со спектакуларна претстава на полувремето. Главни ѕвезди на тој настап ќе бидат Мадона, Шакира и мегапопуларниот бенд BTS.
Светското првенство во 2026 година е заеднички организирано од Соединетите Американски Држави, Канада и Мексико, а турнирот ќе трае од 11 јуни до 19 јули.
