Руски танкер за гас што плови без екипаж во Средоземното Море е „целосно надвор од контрола“, соопштија денеска либиските власти.
Либиската управа за пристаништа и поморски транспорт соопшти дека кабелот за влечење прикачен на напуштениот брод „Арктик Метагаз“ се скинал за време на операцијата за спасување поради лоши временски услови.
Влечачот не можел повторно да го прикачи танкерот поради технички проблеми, соопшти управата во соопштението.
„Арктик Метагаз“ се запали покрај либискиот брег на почетокот на март по експлозиите.
Русија ја обвинува Украина за напад врз бродот со подводни дронови. Киев официјално не коментираше за инцидентот.
Екипажот од 30 членови беше спасен.
Танкерот, околу 120 наутички милји северно од либискиот пристанишен град Бенгази, сè уште носи товар течен природен гас и гориво.
Либиските пристанишни власти денеска им укажаа на бродовите да бидат исклучително внимателни при пловењето во областа.
Либиската државна нафтена компанија првично имала намера оштетениот танкер да го одвлече до пристаниште и ангажирала специјализирана фирма за оваа намена. Сепак, подоцна одлучила да го премести бродот во меѓународни води.
Одлуката, наводно, била донесена под притисок на јавноста, а критичарите предупредувале на ризиците што ги претставуваат големите количини течен гас и дизел на бродот во близина на брегот.
