Студија на ирската компанија за патничко осигурување JustCover го издвои Лисабон како најшарениот град во светот. На анализираните фотографии од португалската престолнина беа откриени повеќе од 2,6 милиони бои.
Во време кога патувањата сè повеќе се евидентираат на социјалните мрежи, естетиката и визуелниот впечаток станаа важни фактори при изборот на дестинација за одмор, барем за оние кои уживаат во фотографијата и креирањето содржини. Според студијата на JustCover, во визуелните претстави на Лисабон беа идентификувани повеќе од 2,6 милиони бои.
Португалската престолнина е позната по пастелните згради и декоративните плочки што ги покриваат историските области како што е Алфама, како и по жолтите трамваи што возат низ неговите тесни улички, објавува Euronews.
Куала Лумпур, Малезија е на второто место, со впечатлив контраст на бои помеѓу модерните облакодери и традиционалните згради, вклучувајќи ги и украсните храмови и светилишта. Скалите „Виножито“ во пештерите Бату често се поврзуваат со оваа дестинација и, иако не се наоѓаат во самиот град.
Градот Порто го зазема третото место, што дополнително го зајакнува присуството на Португалија на листата. Како и во Лисабон, теракотните покриви и препознатливите шарени куќи покрај реката Дуро ја зголемуваат неговата уникатност. Калдрманите улици и историските винарски визби им даваат на посетителите автентичен увид во португалскиот живот и боите на градот.
На четвртото место е пристанишниот град Картахена во Колумбија, познат по своите живи бои. Едно од неговите обележја е жолтата часовна кула на главниот влез во Стариот град. По должината на улиците, зградите во виножитни нијанси и балконите полни со цвеќиња дополнително го збогатуваат визуелното искуство на градот.
Рио де Жанеиро, Бразил, е рангиран на петтото место меѓу најшарените градови, со повеќе од 2,3 милиони уникатни бои идентификувани на фотографиите од неговите пејзажи и згради. Скалите на Селарон, покриени со жолти, сини и зелени плочки, се една од најпознатите атракции на градот, привлекувајќи милиони туристи секоја година.
За оваа анализа беа користени репрезентативни дневни фотографии од секоја локација, без силни филтри. Потоа, беше користена алатка за да се идентификува бројот на бои присутни на сликите, која ги издвои најшарените дестинации.
Ова се 15-те најшарени градови во светот:
Лисабон
Куала Лумпур
Порто
Картахена
Рио де Жанеиро
Гванахуато
Хавана
Ханој
Њу Орлеанс
Меделин
Дубровник
Сингапур
Антигва
Барселона
Њујорк
