Европската комисија ги казни модните брендови „Гучи“, „Клое“ и „Леве“ со вкупна сума од над 157 милиони евра поради договарање на цени при препродажба, со што ги прекршиле на правилата за конкуренција на ЕУ.
Како што соопшти Комисијата, нејзината истрага утврдила дека трите компании ја ограничувале можноста на независните трговци на мало со кои соработуваат да одредуваат свои онлајн и офлајн малопродажни цени за производите дизајнирани од „Гучи“, „Клое“ и „Леве“.
– Ваквото антиконкурентско однесување ги зголемува цените и го намалува изборот за потрошувачите, заклучи Комисијата, додавајќи дека поради соработката на компаниите во истрагата решила да им изрече пониски казни од првично предвидените.
Со одлуката, „Гучи“ е казнет со 119,674 милиони евра, „Клое“ со 19,69, „Леве“ со 18 милиони евра.
Во врска со изречените казни, извршната потпретседателка за чиста, праведна и конкурентна транзиција, Тереза Рибера порача дека трите компании се санкционирани поради мешање во одредувањето на цените на независни трговци на мало.
– Оваа одлука испраќа силен сигнал до модната индустрија и пошироко дека нема да толерираме ваков вид практики во Европа и дека фер конкуренцијата и заштитата на потрошувачите важат за сите подеднакво, додаде Рибера.
Според неа, сите потрошувачи во Европа, што и да купуваат и каде и да купуваат, заслужуваат да ги уживаат придобивки од вистинска ценовна конкуренција.
