Седницата на новоформираниот Совет на Општина Тетово денеска се пренесуваше на интернет и општинските профили на социјаните мрежи, но без превод на македонски јазик кога се зборува на албански, објави порталот „Тетово инфо“.
На новинарско прашање кога седниците кои се пренесуваат во живо на интернет страницата на Општина Тетово ќе имаат превод и на македонски јазик, старо-новиот претседател на Советот, Бесарт Дурмиши, рече дека за тоа се потребни нови апарати, но општината сѐ уште нема најдено пари за да ги набави.
„Треба да се види во ребалансот и во новиот буџет кога ќе го планираме за идната година да се предвидат средства за да се стават и да се купат елементи за превод на македонски јазик“, рече Дурмиши.
По вонредните избори на 20 август, денеска се одржа конститутивна седница на Советот на Општина Тетово, на која за претседател беше избран Бесарт Дурмиши од Беса, кој и во претходниот состав ја извршуваше оваа функција. За него гласаа вкупно 16 советници, што претставува тесно мнозинство од вкупно 31 член, односно 12-те советници од Движење Беса и четворицата од ВМРО ДПМНЕ. Останатите присутни 14 советници од ДУИ, ДПА, СДСМ и Алтернатива, гласаа воздржано.
Првата седница почна да ја води најстариот член, Ратко Давидовски, кој по изборот го препушти местото на новоизбраниот Дурмиши.
