Бебето кое се роди под урнатините на зградата по земјотресот што ја погоди Сирија сега има шест месеци и расте во семејството на неговите посвоени родители во Џиндерис, Сирија.
Бебето се уште било поврзано за мајка си со папочната врвца кога спасувачите го извлекле од урнатините, 10 часа по земјотресот чиј епицентар беше во Турција.
Во земјотресот загина целото семејство, а телата беа пронајдени на излезот од зградата, која се урна. Се претпоставува дека мајката го родила бебето под урнатините, а потоа починала.
Вработените во болницата на девојчето му го дале име Аја, што значи чудо или дар од Бога. Меѓутоа, нејзините посвоители ја прекрстиле во Афра.
Девојчето го посвоил нејзиниот вујко Калил ал-Савади и таа сега живее и расте со неговото семејство и децата.
